正所謂「入屋叫人，入廟拜神」，可見香港人十分重視宗教禮儀，層次已經等同要尊敬屋企人一樣！而紮根喺香港仔嘅漁民都一樣，經常出海作業嘅佢哋往往都會透過祭祀祈求捕魚順利。所以香港仔同鴨脷洲都有唔少廟宇。小編就帶大家睇下幾間啦！👀
【石排灣天后廟】
又稱為香港仔天后廟，建於1840年代，是香港最古老的天后廟之一。石排灣天后廟係為咗祭祀海洋女神天后而建成的廟宇嚟㗎。建築風格都採用典型傳統中國建築風格，顏色以紅色同金色為主🔴🟡並有著複雜的木雕和壁畫。而香港仔天后廟最特別嘅地方一定係屋頂上裝飾著嘅四條蟠龍，以蟠龍🐉做屋頂裝飾係其他天后廟中係比較少見㗎。1961年英國雅麗珊郡主曾經拜訪過呢到添！
【海王大神廟】
而喺成都道同南寧道交界嘅「海王大神廟」就係現存最特別嘅廟宇，座落喺馬路中心。除咗面積比起一般廟宇細、信眾要耷低頭入去之外，亦係全港少有供奉海王大神嘅廟。以前海王大神廟係位處海邊，好多漁民都會專程過去祈求平安。不過自香港仔開始城市發展以及填海後，呢個廟已經逐漸遠離海邊，時至今日已經佔據咗馬路一啲嘅位置。或者你會問點解唔好好搬走加安置佢？答案係「搬不得」，據聞幾十年前的確係有計劃將佢搬離，但冇耐附近嘅建築就無端發生火警。及後街坊一致認同要原址保存個廟，所以就造就咗呢個咁獨有嘅場景喇🤓
【香港仔廟仔群】
喺香港仔舊大街、去蒲窩嗰條斜路路口有個小型廟宇群，獨特之處係佢哋座落喺一棵大榕樹下。相傳當年村民認為將神像石碑等安放喺大樹之下，可以透過樹根將佢哋祈求嘅事情傳達俾神明知道。
【鴨脷洲洪聖古廟】
喺清代乾隆三十八年，即1773年就已經建成，立廟至今已經有二百幾年歷史。鴨脷洲洪聖古廟主要祀海神「洪聖」🌊，而其他供奉的神祇就包括關帝、太歲、文昌及觀音等。鴨脷洲洪聖古廟嘅建築風格都係比較傳統嘅。例如：廟外左右垂脊末端置有日神、月神陶塑，廟前檐板飾有牡丹、佛手果等吉祥圖案，充滿中國傳統色彩㗎🧧。而鴨脷洲洪聖古廟最特別嘅地方係佢嘅結構，全廟共以五對柱支撐，當中第二同第三對柱會承接住廟側捲棚式走廊的綠色琉璃瓦簷頂，簷頂花脊上更加有文武造型嘅廣東石灣陶塑人物。
如果你都有興趣睇下呢兩架咁有傳統特色嘅古廟🐲，就快啲嚟啦~
Comments