top of page

香港仔炮台



【香港仔歷史小知識】喺二戰期間,日軍攻佔香港,就此爆發一場 「香港保衛戰」,歷時十八日,當中又以港島戰線佔最長時間。然而,兩軍實力懸殊,駐港英軍拼命死守下終以失敗告終。港島戰線係歷時最耐,除咗因為當時嘅軍人有死守港島嘅決心外,仲有賴接下嚟要介紹嘅設施——香港仔炮台。


建造砲台嘅原因要追溯至一九三零年代末,當時國際關係非常緊張,唔同國家都已經察覺到德國同日本嘅野心,英國都唔例外。所以為咗加強對於香港嘅防守,決定係香港島南邊興建三座炮台,包括黃麻角炮台(Bluff Head Battery),鶴咀炮台(Cape D'Aguilar Battery)同埋香港仔炮台(Aberdeen Battery)以保護位於香港仔嘅軍事基地。


隨著日軍於一九四一年發動太平洋戰爭,香港保衛戰一觸即發⚔。日軍明白香港仔基地對於香港島嘅重要性,所以不斷派戰機對基地進行轟炸,雖然摧毀咗好多基地嘅設施,但一直未能夠破壞香港仔炮台。之後香港嘅守軍一直利用炮台去牽制日軍喺香港島嘅攻勢,但最終香港島嘅守軍受多面夾擊被逼撤退投降。離開前為咗避免炮台被日軍利用,守軍選擇自行破壞炮台,香港仔炮台亦完成佢嘅歷史任務。


及後日軍投降後,因為冇實質作用以及城市發展嘅緣故,香港仔炮台被拆卸,淨係留低咗好小部份嘅設施。但無論佢剩番幾多都好,都掩蓋唔到佢對於香港嘅歷史價值。有興趣嘅朋友不妨到炮台遺址參觀吓!


Comments


bottom of page